नवलपूरमा बन्दकर्ताले ट्रकमा आगो लगाए

बर्दिया, जेष्ठ १२ । राजेन्द्र महतो समूहको सद्भावना पार्टीले आह्वान गरेको मधेश बन्दका कारण आज तराईका जिल्लाको जनजीवन प्रभावित बनेको छ । बन्दले धनुषा, महोत्तरी, सिरहा, सप्तरी, सर्लाही, बारा, पर्सा, मोरङलगायतका जिल्लाका जनजीवन असर परेको छ ।
 पश्चिम तराईका चितवन, नवलपरासी, रुपन्देही, कपिलवस्तु, बर्दियालगायतका जिल्लामा पनि यातायातका साधन चल्न दिइएको छैन ।
तत्काल चुनावको मितिको घोषणा गर्नुपर्ने, महतोको अनसनमा हस्तक्षेप गर्नेलाई कारवाही गर्नुपर्ने जस्ता माग उनीहरुको छ । सर्लाहीमा भने बन्दकर्ताले नवलपुर–लालवन्दीबीचको जंगलमा एउटा ट्रकमा आगजनी गरेका छन् । नवलपुरमा पसल बन्द गराउँदै हिँडेकालाई प्रहरीले रोकेपछि बन्दकर्ताले ट्रकमा आगजनी गरेका हुन् । सप्तरीको भारदहमा पनि सडक अवरुद्ध गरी राजमार्ग ठप्प पारिएको छ ।