कुलेखानी जलविद्युतमा आगलागी, २५ करोडको क्षति

४ वैशाख, हेटौँडा । हेटौंडाको भैसे गाविस-१ स्थित कुलेखानी जलविद्युतमा दोस्रो आयोजनाको कम्पाउन्डमा रहेको तीनवटा विद्युत ट्रान्सर्फमरमा गए राति आगलागी हुँदा करिब २५ करोड रुपैयाँ बराबरको सम्पत्ति जलेर नष्ट भएको छ । गएराति पौने १२ बजे सो ट्रान्सर्फमरमा भएको आगलागीबाट सो मूल्य बराबरको नोक्सान भएको आयोजना प्रमुख कृष्णप्रसाद यादवले जानकारी दिनुभयो । आगलागीका कारण कुलेखानी दोस्रोबाट उत्पादन हुने ३२ मेगावाट विद्युत् उत्पादन हिजो रातिबाटै अवरुद्ध भएको आयोजनाका प्रशासकीय अधिकृत शारदाविक्रम मल्लले बताउनुभयो । आयोजनाबाट उत्पादित बिजुली जलेको ट्रान्सर्फमरबाट काठमाडौँको केन्द्रीय विद्युत् ग्रीडमा जोडिने गरेको छ ।

नेपाली सेना, प्रहरी, स्थानीय बासिन्दा, चितवन, वीरगन्ज र हेटौँडाका दमकलले करिब दुई घण्टापछि सो आगो नियन्त्रणमा लिएको थियो । रासस