बंगलादेशमा रोकिएन दंगा, फेरि ७ को मृत्यु, ४० बढी घाइते (भिडियोसहित)

एजेन्सी, फाल्गुन २० । बंगलादेशमा मुश्लिम नेता दिलवर हुसेन सइदीविरुद्ध सुनाइएको मृत्युदण्डको फैसलाको विरोधमा उत्तरी बोग्रा जिल्लामा भड्किएको हिंसामा परी कम्तिमा सात जनाको मृत्यु भएको छ । झडपमा ४० भन्दा बढी घाईते भएका छन् ।
बोग्रा जिल्लामा जमात पार्टीका कार्यकर्ताहरुले प्रहरी पोष्टमा आक्रमण गरेपछि त्यहाँ सेना परिचालन गरिएको छ । उत्तर पश्चिमी शहर गोदागारीमा पनि प्रहरी र प्रदर्शनकारीबीच व्यापक झडप भएको खबर छ ।
हिजो मात्र चित्तागाउंमा तीन जनाको मृत्यु भएको थियो । सइदीको जमात–ए–इस्लामी पार्टीले फैसला विरुद्ध दुई दिने आमहड्तालको आह्वान गरेको छ ।

सन् १९७१ मा पाकिस्तानबाट अलग मुलुक बन्ने क्रममा भएको स्वतन्त्रता संग्राममा युद्ध अपराध गरेको ठहर गर्दै सइदीलाई गत बिहिवार मृत्युदण्डको सजाय सुनाइएको थियो ।
त्यसयता भड्किएको हिंसामा ५० भन्दा बढीको मृत्यु भैसकेको छ । इस्लामिक प्रदर्शनकारीहरुले सइदी विरुद्धको अभियोग राजनीति प्रेरित भएको आरोप लगाए पनि सरकारले भने आरोप अस्वीकार गरेको छ ।
यता बंगालादेशमा हिंसात्मक घटना बढ्न थालेपछि अमेरिकाले पनि चासो व्यक्त गर्दै शान्त रहन सबैलाई अपील गरेको छ ।