ख्यालख्यालमै चुनावी माहोल शुरु

४ चैत, काठमाडौं । मुख्य दलहरुको सहमति अनुसार असार पहिलो हप्ताभित्र चुनाव हुने/नहुने पत्तो नभएपनि देशभर चुनावी माहोल शुरु भैसकेको छ । प्रधानन्यायाधीश खिलराज रेग्मीको नेतृत्वमा चुनावी सरकार गठन भए लगत्तै चुनावी वातावरण बन्न थालेको हो । अस्तिताकासम्म के को चुनाव भनेर ओठ लेब्राउने जनता बिस्तारै चुनावी गफगाफमा रम्न थालेका छन् ।

निर्वाचन आयोगमा प्रमुख निर्वाचन आयुक्त नियुक्त गर्न दलहरुले तयारी शुरु गरिसकेका छन् । यसअघि निमित्त भएर काम गरेर अनुभव हासिल गरिसकेका निलकण्ठ उप्रेतीलाई आयोग प्रमुख बनाउने तयारी भएको हो । पदाधिकारी नियुक्त हुन बाँकी भएपनि निर्वाचन आयोगले आफ्नो तर्फबाट तयारी र गृहकार्य जारी राखेको छ । मतदाता शिक्षासँगै छुटेकाहरुको नामावली संकलनको काम भैरहेको आयोगका प्रवक्ता अनिलकुमार ठाकुरले जानकारी दिनुभयो ।

‘देशका सबै गाविस र नगरपालिकामा छुटेकाहरुको फोटो सहितको मतदाता नामावली संकलनको काम भैरहेको छ’ ठाकुरले अनलाइनखबरसित भन्नुभयो ।

छुटेकाहरुको मतदाता नामावली संकलनको काम चैत महिनाभरी नै चल्ने ठाकुरले बताउनुभयो । जम्मा एककरोड ५४ लाख मतदाता रहेकोमा अहिलेसम्म एककरोड १० लाख नामावली संकलन भैसकेको आयोगले जनाएको छ । प्रवक्ता ठाकुरका अनुसार नामावली संकलनसँगै मतदाता शिक्षाको काम पनि भैरहेको छ ।

काठमाडौंमा घरदैलो कार्यक्रम

जिल्ला निर्वाचन कार्यालय काठमाडौंले फोटो सहितको मतदाता नामावली संकलन तथा अद्यावधिक बनाउन घरदैलो कार्यक्रमलाई फेरि निरन्तरता दिन थालेको छ । घरघरमा पुगेर नामावली संकलन तथा संकलन भएकाहरुको नामावली अद्यावधिक गरी शुद्ध गरिने कार्यालयले जनाएको छ । यसका लागि वडा कार्यालयहरुमा गठन भएका वडा नागरिक मञ्चलाई परिचालन गरिएको जिल्ला निर्वाचन कार्यालयले जनाएको छ ।

चैत महिनाभर काठमाडौं जिल्लाका सबै गाविस सहित महानगरपालिका र कीर्तिपुर नगरपालिकाका रहेक वडामा स्थायी एवं अस्थायी रुपमा बसोबास गरिराखेका मतदाताको फोटो सहितको मतदाता नामावली संकलन गरिने जिल्ला निर्वाचन कार्यालयले जनाएको छ ।

कार्यालयका प्रमुख शम्भुप्रसाद चालिसेका अनुसार हालसम्म काठमाडौंमा स्थायी रुपमा बसोबास गरेका पाँचलाखभन्दा बढी मतदाता र बिभिन्न जिल्लाबाट आई अस्थायी रुपमा बसोबास गरेका एकलखा ५० हजारभन्दा बढी मतदाताको फोटोसहितको मतदाता परिचयपत्र बनाई सम्बन्धित जिल्लामा पठाइसकिएको छ ।