आदिवासी जनजातिले चार दलका शीर्षनेतालाई बहिस्कार गर्ने

सन्तकुमार चौधरी

२७ बैशाख, चितवन । नेपाल आदिवासी जनजाति महासंघले आफ्नो शनिबारबाट चितवनमा शुरु हुने आफ्नो आठौं राष्ट्रिय महाधिवेशनमा मुख्य चार राजनीतिक दलका शीर्ष नेताहरुलाई सहभागी गनराउने भएको छ । आदिवासी जनजातिको मुद्दामा राजनीतिक दलहरुले भ्रम फैलाएको भन्दै महासंघ अध्यक्ष राजकुमार लेखीले चारै दलका शीर्ष नेताहरु प्रचण्ड, सुशील कोइराला, झलनाथ खनाल र विजयकुमार गच्छदारलाई कार्यक्रममा निम्तो नगरिएको बताउनुभयो ।

अधिवेशनको उद्घाटन उपराष्ट्रपति परमानन्द झाबाट गराइने भएको छ ।आदिवासी जनजाति पत्रकार संघ (अनिज) चितवनले आयोजना गरेको पत्रकार भेटघाटमा अध्यक्ष लेखीले चारनेता प्राइभेट लिमिटेडले नयाँ शैलीमा भ्रष्टाचार गर्दै राजतन्त्र फर्काउने खेलमा लागेको आरोप समेत लगाउनुभयो । अध्यक्ष लेखीले राष्ट्रपति र चार दलका शीर्ष नेताका कारण देशमा सैनिक शासनको खतरा बढेको बताउनुभयो ।

महाधिवेशनको उद्घाटनपूर्व शुक्रबार चितवनको भरतपुरमा मोटरसाइकल र्‍याली निकालिएको छ । महाधिवेशनको अन्तिम तयारीसहित सर्वसाधारण भरतपुरमा उतार्न चार दर्जन ठूला यात्रुवाहक बस चितवनका गाउँ गाउँ पठाइएको महासंघले जनाएको छ । महाधिवेशन सफल पार्न देशभरका ७१ जिल्लाबाट प्रतिनिधि र पर्यवेक्षकहरु भरतपुर पुगिसकेका छन् । महाधिवेशनका लागि एक महिना अघिदेखि तयारीमा जुटेको महासंघले बढ्दो गर्मीलाई बेवास्ता गर्दै चितवनलाई बेहुली झैं सिंगारेको छ ।

सौराहाका होटलमा ३ सय कोठा बुकिङ

महाधिवेशनमा सहभागी प्रतिनिधि एवं पर्यवेक्षकहरुका लागि खाना तथा आवासका लागि चितवनको सौराहामा विभिन्न होटलहरुमा ३ सयवटा कोठा बुकिङ्ग गरिएको छ । महासंघको बन्द सत्र भने पर्यटकीय क्षेत्र सौराहामा आईतबार र सोमबार हुने छ । महाधिवेशनले १३ सदस्यीय सचिवालय पदाधिकारी समेत चयन गर्ने छ ।

तेइस वर्षपछि पहिलोपटक राजधानी बाहिर हुन लागेको महाधिवेशनको उद्घाटन सत्रमा ७१ जिल्लावाट पाँच सय पर्यवेक्षक र प्रतिनिधिहरु शनिबारबाट आफ्नो छाता संगठनको नयाँ नेतृत्व चयन गर्न जुट्ने छन् । भरतपुरको वीरेन्द्र वहुमुखी क्याम्पस परिसरमा हुनेछ ।महाधिवेशनको उद्घाटनमा एमाओवादीका वर्षमान पुन, माओबादीका नेता रामबहादुर थापा, समाजवादी जनता दलका अध्यक्ष अशोक राईलगायतका नेतालाई भने बोलाइएको छ ।