ओम गुरुङको दुबै मृगौलामा खरावी, उपचारमा सहयोग गर्न आग्रह

१० साउन, काठमाडौं । आदिवासी जनजाति आन्दोलनका अग्रज प्रा. डाक्टर ओम गुरुङको दुवै मृगौलामा खरावी देखिएको छ । नेपाल आदिवासी जनजाति महासंघका पूर्व महासचिव समेत रहेका गुरुङको उपचारमा आर्थिक सहयोग जुटाउन ‘प्रा. डाक्टर ओम गुरुङ उपचार सहयोग समिति’ गठन गरिएको छ ।

तमु हृयुल छोजधी राष्ट्रिय परिषदका अध्यक्ष रेशम गुरुङको संयोजकत्वमा गठित सहयोग समितिले गुरुङको उपचारका लागि सहयोग गर्न अपील गरेको छ । ओम गुरुङको छोरी बिजया गुरुङको स्ट्याण्डर्ड चार्टड बैङ्क जावलाखेल शाखाको वचत खाता नं १८२५४१२७००१ मा सिधै रकम जम्मा गर्नु भई संयोजक संस्थाको इमेलमा जानकारी दिनसक्नुहुनेछ । 

डाक्टरहरुको सल्लाह अनुसार गुरुङको मृगौला प्रत्यारोपण गर्नु पर्ने भएको छ । नेपाल तथा भारतका विभिन्न अस्पतालका चिकित्सकहरुबाट यथाशिघ्र उपचार गर्नुपर्ने कुरा पुष्टि भएकोले प्रा. डाक्टर गुरुङ अहिले नेपाल तथा भारतका अस्पतालहरुमा आफू र आफ्नै परिवारको तर्फबाट उपचार गराइरहनु भएको छ ।

समितिले गुरुङको जीवन रक्षा गर्नु राज्यको पनि दायित्व भएकाले वहाँको स्वास्थ्य उपचारको सम्पूर्ण जिम्मा राज्यले लिनुपर्ने माग समेत गरेको छ । विज्ञप्तीमा प्रा. डा. गुरुङको जीवन रक्षाका लागि उपचार सहयोग गर्न नेपाल सरकारलाई आग्रह गरिएको छ । प्रा.डा.गुरुङ त्रिभुवन विश्वविद्यालयका समाजशास्त्र तथा मानवशास्त्रको प्राध्यापक तथा विभागिय प्रमुख समेत हुनुहुन्छ ।