१० वटा बुद्ध मुर्ति ठड्याईने चेतावनी

सुर्खेत काक्रेविहार बुद्धमुर्ती प्रतिस्थापन संयुक्त संघर्ष समितिले सरकारलाई एक महिने अल्टीमेटम  दिएको छ । विहिबार बृहत र्याली तथा सडक जनसभा गरेर सरकारलाई सुर्खेतको कॉक्रेबिहारमा एक महिनाभित्र बुद्धको मुर्ती प्रतिस्थापन गर्न सरकारलाई अल्टीमेटम दिएको हो । एक महिनाभित्र सरकारले बुद्धको मुर्ती प्रतिस्थापनाको वातावरण नबनाएमा समितिले कॉक्रेबिहारमा १० वटा बुद्धको मुर्ती स्थापना गर्ने चेतावनी दिएको छ ।
बिहिबार  विहान ९ बजे बसन्तपुर डवलीमा भेलाभई शुरु भएको र्याली न्युरोड, जमल, रत्नपार्क, बागबजार, पुतली सडक, पद्यमोद्धय मोड हुदै प्रदर्शनी मार्गमा पुगी बृहत शान्ति र्याली तथा सडक जनसभामा परिणत भएको थियो । जनसभालाई सम्बोधन गर्दै नेपाल आदिवासी जनजाति महासंघका अध्यक्ष नगेन्द्रकुमार कुमालले काक्रेविहार घटनाप्रति सरकार सम्बेदनशिल नभएको बताए । सरकारले शान्तिपुर्ण आन्दोलनलाई वेवास्ता गरेको आरोप लगाउँदै छिट्टै चौथो चरणको आन्दोलनका कार्यक्रम थालिने पनि अध्यक्ष कुमालले बताए । ‘चौथो चरणको आन्दोलन शसक्त र दबाबमुलक हुनेछ ।’ अध्यक्ष कुमालले भने । तेश्रो चरणको आन्दोलन विहिबार सकिएपनि सरकार विरुद्ध छिट्टै शसक्त आन्दोलनको कार्यक्रम ल्याउने नेपाल बौद्ध महासंघका उपाध्यक्ष थुक्तेन जीग्दोलले बताए । जनसभालाई सम्बोधन गर्दै उपाध्यक्ष जीग्दोलले बृहत शान्ति र्याली अत्यन्त सफल भएको उल्लेख गरे । उनले भने,‘सरकारले शान्तिपूर्ण आन्दोलनलाई सुनेन ।
अबको आन्दोलन सरकारले सुन्ने र बोल्नैपर्ने खालको दबाबमूलक र शसक्त हुनेछ । काक्रेविहारमा बुद्धको मूर्ति प्रतिस्थापन गर्न नदिइएको विषयमा लामो समयदेखि बौद्धमार्गीहरुले सरकारको विरोधमा कार्यक्रमहरु गर्दै आएका छन् । तर सरकारले भने बौद्धार्गीहरुको मागका विषयमा कुनै चासो देखाएको छैन ।
 तेश्रो चरणको आन्दोलन भदौ २ गतेबाट शुरु गरेको संघर्ष समितिले विहिबार भदौ १३ गते बृहत र्याली र जनजसभा गरी तेश्रो चरणको आन्दोलन सकिएको बताएको छ । र्यालीमा हजारौंको संख्याका बौद्धमार्गी र आदिवासी जनजातिहरुको सहभागिता रहेको थियो । यसैविच धर्मनिरपेक्ष राज्यको मान्यता विपरित धार्मिक सद्भाव विथोलिने गरी राज्यद्वारा बौद्धमार्गीहरूमाथि गरिएको दमन गरिएको विरोधमा सिन्धुलीका जातीय तथा धार्मिक संघ/सस्थाले गम्भीर ध्यानाकर्षण भएको बताएका छन् ।
उनीहरुले विहिबार सरकारको विरोधमा र्याली प्रदर्शन गर्दै जिल्ला प्रशासन कार्यालय सिन्धुलीमार्फत मन्त्रीपरिषदका अध्यक्षलाई ज्ञापन पत्र बुझाएका छन् । ज्ञापनपत्र बुझाउदै उनीहरुले राज्यले सवै धर्मलाई समान व्यवहार गर्नुको नीति नअपनाए सुर्खेतबाट शुरू भएको धार्मिक विभेद र दमन विरूद्धको प्रतिरोध आन्दोलन देशव्यापीरूपमा सशक्त बनाइने समेत चेतावनी दिएका छन् । नेपाल तामाङ घेदुङका केन्द्रीय सचिव काजीमान थिङ, नेपाल आदिवासी जनजाति महासंघ सिन्धुलीका अध्यक्ष सूर्य पाख्रिन, नेपाल अहिंसावादी वौद्ध धर्म विश्व शान्ति चक्र संघ सिन्धुलीका अध्यक्ष जयमान तामाङ, वोधी श्रमण धर्म संघ सिन्धुलीका उपाध्यक्ष श्रीकृष्ण घिसिङद्धारा हस्ताक्षरित विज्ञप्तीमा सुर्खेतको काँक्रेबिहारमा वुद्धको प्रतिमा स्थापनामा प्रहरीले अवरोध गरेको घटनाप्रति सिन्धुलीका जातीय तथा धार्मिक संघ/सस्थाहरुले विरोध जनाएको उल्लेख गरेका छन् ।
नेपाल तामाङ घेदुङ, नेपाल आदिवासी जनजाति महासंघ, नेपाल आदिवासी बौद्ध धर्म विश्व शान्ति चक्र संघ र बोधी श्रवण धर्म संघ, सिन्धुलीले सिन्धुलीमाडीमा पत्रकार सम्मेलनको आयोजना गरी काँक्रेबिहारमा प्रहरीले बुद्धको मुर्ति खोसेर सुर्खेत जिल्ला प्रहरी कार्यालयको सेफ्टी ट्याङ्की माथि अपमानित रूपमा फ्याँकिएको घटनाले बौद्धमार्गीहरूको आत्मामा गहिरो चोट पुगेको उल्लेख गरेका छन् ।
आनन्द गुरुङ