प्रचण्ड र बाबुराम संविधानसभा बाहिरै बस्ने संकेत

११ मंसिर, काठमाडौं । निर्वाचनमा धाँधली भएको भन्दै संविधानसभामा नजाने बताउँदै आएको एकीकृत नेकपा माओवादीले शीर्षनेता प्रचण्ड र बाबुरामलाई संविधानसभामा सहभागी नगराउने र महरालाई संसदीय दलको प्रमुख बनाएर संसदीय संघर्षमा सहभागिता जनाउनेबारे आन्तरिक छलफल थालेको छ । ’संविधानसभामा पार्टी संविधानसभामा जान्छ, तर अध्यक्ष प्रचण्ड र बरिष्ठ नेता डा. बाबुराम भट्टराईचाहिँ संविधासभामा नजाने सम्भावना छ ।’

एमाओवादीका एक केन्द्रीय सदस्यले अनलाइनखबरसँग भने, ‘शीर्षनेताहरु नगएर महराको नेतृत्वमा सहभागिता जनाउने विषयमा समेत पार्टीभित्र एकथरि साथीहरुले छलफल चलाउन थाल्नुभएको छ ।’ संविधानसभामा तेस्रो दल बनेको एमाओवादीलाई पनि सरकारमा सामेल हुन कांग्रेस र एमालेका नेताहरुले आग्रह गरिरहेका छन् । यो अवस्थामा प्रचण्ड र बाबुरामले संविधानसभामा गएपछि संसदीय दलको नेतृत्व गर्नेपर्ने भएकाले महरालाई नै संसदीय दलको प्रमुख बनाएर आवश्यक परे उहाँलाई नै सरकारमा पठान सकिने एमाओवादी नेताको तर्क छ । एमाओवादी नेता कृष्णबहादुर महराले ०४८ सालमा पनि तत्कालीन संयुक्त जनमोर्चाकातर्फबाट संसदको नेतृत्व गर्नुभएको थियो । त्यसबेला संयुक्त जनमोर्चाले प्रतिनिधिसभामा ९ सीट जितेको थियो ।

सरकारमा जानेबारे विवाद कायमै

यसैवीच एमाओवादीको सामेकार सम्पन्न केन्द्रीय समितिको बैठक र त्यसअघि बसेको पूर्वपोलिटब्यूरो बैठकमा संविधानसभामा सहभागी हुनेबारे करिब एक मत देखिए पनि सरकारमा सहभागी हुने कि नहुने भन्ने विषयमा भने दुई लाइन देखिएको छ ।स्रोत का अनुसार एमाओवादी अध्यक्ष प्रचण्ड संविधानसभा मात्रै नभएर सरकारमै जानुपर्ने पक्षमा हुनुहुन्छ भने अन्य केही नेताहरुले चाहिँ संविधानसभामा सहभागी भए पनि सरकारमा जान नहुने बताएका छन् ।

एमाले र कांग्रेसले दुई तिहाइ सीट जित्ने सम्भावना बढेको अवस्थामा एमाआओवादीको अनुपस्थितिमै सरकार बन्न सक्ने भए पनि एमाओवादीलाई समेत सरकारमा सहभागी गराउने कांग्रेस र एमाओवादीको तयारी छ । एमाओवादी नेताहरु सत्ताप्रति लालायित भएकाले उनीहरु सरकारमा आउन सक्ने कांग्रेस र एमाले नेताहको बुझाइ छ । यसैवीच एमाओवादीले पनि सहमतीय प्रणालीमा जानुपर्ने माग अघि सारेर सरकारमा सहभागी हुन सकिने संकेत गरेको छ ।